جان لینن، (اکتوبر 9، 1940ء دسمبر 8، 1980ء) معروف برطانوی موسیقار، گلوکار اور گیت نگار تھے۔ بہت سے انفرادی گیتوں کے علاوہ مقبول گروہ "بیٹلز" کے بانی کی حیثیت سے شہرت کے حامل ہیں۔ پال میکارٹنے کے ساتھ جان لینن کی مشہور زمانہ سنگت نے بیسویں صدی کے عظیم ترین شاہکار تخلیق کیے۔

لیورپول، انگلستان میں زندگی کے ابتدائی ایام اس نے نہایت بے آرامی میں گزارے۔ اس کا پہلا بینڈ کویریم 1960ء میں بیٹلز کے نام سے مشہور ہوا۔ ایک دہائی بعد بیٹلز بینڈ کے ٹوٹنے کے بعد لینن نے متعدد انفرادی گیت ریکارڈ کروائے جن میں "گو پیس اے چانس" (امن کو ایک موقع دو) اور "امیجن" صدی کے شاہکار سمجھے جاتے ہیں۔ گانے "امیجن" کو پاکستان کے مزمل آفاق پیرزادہ نے اردو میں ترجمہ کر کے بھی گایا ہے۔ 1975ء میں اپنے خاندان کو وقت دینے کے لیے لینن نے موسیقی کی خیرباد کہا لیکن 1980ء میں وہ دوبارہ موسیقی کے افق پر نمودار ہوا اور اپنا آخری البم "ڈبل فنٹےسی" جاری کیا۔ اس البم کے اجراء کے تیسرے ہفتے لینن کو قتل کر دیا گیا۔